ارسطو دی بوطیقا | سرائیکی | اسلم رسولپوری

میں او خوش قسمت بندہ ہاں جیکوں دنیاٸےادب دی مہان شخصیت سٸیں اسلم رسول پوری ہوراں دی شفقت ، آدُر پیار تے محبت میسر ہے ۔ میکوں اعزاز حاصل ہے جو میڈی نِکڑی جھٸیں لاٸبریری وچ رسول پوری صاحب دے سراٸیکی قاعدہ کنوں گھن تے سراٸیکی وچ ہٸیتی تنقید تک انہاں دے سبھے تصنیفات موجود ہن تہوں میڈی لاٸبریری بہوں وڈی لاٸبریری ہے ۔ سٸیں دا تھورا انہاں آپڑی نویں کتاب ارسطو دی بوطیقا عنایت فرماٸی ہے ۔ بوطیقا کوں ادبی دنیا وچ جیڑھا مقام حاصل ہے او کہیں کنوں گُجھا کٸے نی ۔ بوطیقا وابستگانِ شعر و ادب واسطے ہک رہنما کتاب دا درجہ رکھدی ہے تہوں ایں کتاب دے ڈھیر سارے زبانیں وچ ترجمے کیتے گٸین ۔ اسلم رسول پوری ہوراں ارسطو دی بوطیقا دا سراٸیکی ترجمہ کر تے سراٸیکی ادب وچ سوہنڑاں ودھارا کیتے ۔ رسول پوری صاحب وکالت کنوں ریٹاٸر تھی کے باقی ریٹاٸرڈ لوگیں وانگوں نکم دی چادر نٸیں ولھیٹی بلکہ پہلے کنوں وی زیادہ سراٸیکی ادب دی خدمت وچ مصروف عمل ہِن ۔ ارسطو دی بوطیقا فکشن ہاٶس چھاپی ہے تے پبلشر ایندے مار مساٸیں چالھی پنجھاہ نسخے صاحبِ کتاب کوں ڈتے ہوسن ۔ سٸیں ہوراں دا تھورا ہے جو انہاں فقیر کوں یاد رکھیے ۔ کتاب مل گٸی ہے سوچم پہلے رسید بھجوا ڈیواں تاکہ سند راہوے۔ دعا ہے اللہ پاک انہاں کوں سُکھی صحت نال چِِرک تٸیں سلامت رکھے